संबंध नाकारणे - Rejecting Relationships - BEED NEWS | I LOVE BEED

BEED NEWS | I LOVE BEED

BEED NEWS , JOBS NOKARI, HELTH CARE, SELFCARE, LIFESTYLE

Breaking

Home Top Ad

Post Top Ad

LightBlog

Friday, December 6, 2019

संबंध नाकारणे - Rejecting Relationships




प्रश्न : मी पसंत नसतानाही केवळ आई-वडिलांच्या इच्छेमुळे माझ्याशी लग्न करावे लागले, असे माझा नवरा पहिल्यापासून सांगत आला आहे. आई-वडिलांना नातवंड हवे, म्हणून त्याने एक मूलही होऊ दिले, असेही त्याचे म्हणणे आहे. त्याला बाळबोध घरगुती बायको नको होती, तर त्याच्या स्टेटसला साजेशी, पाश्चात्य वळणाची मुलगी हवी होती. आम्हाला एक मूल झाल्यावर, गेली पाच वर्षे त्याने माझ्याशी संबंध ठेवणे बंद केले आहे. तो दुसऱ्या बेडरूममध्ये स्वतंत्र झोपतो. एरवी पाहणाऱ्याला आमच्यात काही बिघडलेले आहे, असे कळणारही नाही, एवढे आमचे संबंध मैत्रीपूर्ण, खेळीमेळीचे आणि चांगले आहेत. आमच्यात नवरा-बायकोचे नाते नसून, मैत्रीचे नाते आहे, हे मी, माझा नवरा व माझे सासू-सासरे यांनाच माहिती आहे. माझे आणि माझ्या सासू-सासऱ्यांचे उत्तम पटते. आम्ही तिघे एकमेकांची उत्तम काळजी घेतो, देखभाल करतो, एकत्रित घर सांभाळतो. त्यामुळे आपण घटस्फोट घ्यावा की नाही, हे मला कळत नाही. घेतला तर कोणत्या कारणास्तव घटस्फोट मिळू शकेल?

हेही वाचा : आजीबाईचा बटवा - बाल अरोग्य


उत्तर : नवरा आणि मित्र ही दोन्ही नाती वेगळी आहेत, हे तुम्हालाही माहिती आहेच. नवरा चांगला मित्र असू शकतो; पण मित्र नवरा असत नाही. त्यामुळे दोन्ही नात्यात गल्लत न करणे योग्य. 'आहे मनोहर तरी, गमते उदास' असं तुम्हाला वाटत नसले, तरी तुम्ही घटस्फोट घ्यावा अशी जबरदस्ती तुमच्यावर कोणी करू शकत नाही. सारे काही सुरळीत चालू असताना, ती घडी अचानक मोडणे आणि नव्याने पुन्हा सुरुवात करणे, अनिश्चिततेला सामोरे जाणे, हे सगळे वयाच्या एका टप्प्यावर नकोसे वाटणे, आपल्यामुळे इतरांना त्रास व्हायला नको, असे वाटणे साहजिक आहे. कदाचित याच विचाराने तुमचा नवरा आजवर वागत आला असेल आणि त्यानेही घटस्फोट मागितला नसेल. असे अनेक जण आपल्या आजूबाजूला वावरताना आपण पाहतो. स्वतःच्या इच्छा, आवडींना मुरड घालत, इतरांसाठी त्याग करत जगणारे. याला परिस्थितीशी जुळवून घेण्याचा समंजसपणा म्हणायचे, की स्वतःचे मन मारत जगणे म्हणायचे, हा प्रत्येकाचा वैयक्तिक प्रश्न आहे. काही वेळा अनेक वर्षांच्या तडजोडीनंतर या त्यागाची किंमतही वसूल करण्याचा विचार मांडला जातो. 'एवढे केले मी तुमच्याकरता; पण त्याची तुम्हाला किंमत नाही,' असे म्हणत भावनिक ब्लॅकमेल केले जाते. आज नाही तर उद्या, काही वर्षांनी जर तुम्हाला आपल्याला मित्र-मैत्रीण नव्हे तर नवरा-बायको असे नाते हवे होते, असे वाटले. जोडीदाराची कमतरता जाणवली, तर तोवर कदाचित वेळ निघून गेलेली असेल. तुमच्या बाबतीत असे घडेल का, हे फक्त तुम्हाला माहीत; आपण स्वत:ला जास्त ओळखत असतो. तुमच्या नवऱ्याला, सासू-सासऱ्यांना खरी परिस्थिती माहिती आहेच. तुम्हाला जर एकट्याने निर्णय घेता येत नसेल, तर सर्वांनी एकत्र बसून, एकमेकांना समजून घेऊन योग्य निर्णय घेता येईल.
तसे झाले, तर परस्पर सहमतीने घटस्फोट घेता येईल. त्यामुळे तुमच्या मुलालाही परिस्थितीशी जुळवून घेणे सोपे जाईल. घटस्फोटानंतरही तुमच्यातील मैत्रीचे, सौहार्दाचे नाते तुम्ही टिकवू शकाल. या विषयावर सासू-सासऱ्यांना लगेच विश्वासात घेणे तुम्हाला योग्य वाटत नसेल, तर नवऱ्याला घेऊन समुपदेशन करून घ्या. त्यामुळे एकमेकांना समजून घेण्यास मदत होईल. जर सकारात्मक बदल घडून तुमचा संसार सुरळीत झाला, तर उत्तमच. तसा न झल्यास घटस्फोट घेण्याचा निर्णय तरी तुम्हाला परस्पर सहमतीने घेता येईल. तो निर्णय एकत्रितपणे कुटुंबियांना सांगता येईल. काही कारणाने जर तुमच्या नवऱ्याची घटस्फोटाला तयारी नसेल; पण तुम्हाला घटस्फोट हवाच असेल, तर तुम्हाला न्यायालयात घटस्फोटाचा एकतर्फी दावा करावा लागेल. तुम्ही एकाच घरात जरी राहत असलात, तरी तुम्ही पाच वर्षे वेगवेगळ्या खोल्यांत राहत आहात, तुमच्या नवऱ्याची तुमच्याशी वैवाहिक संबंध ठेवण्याची इच्छा नाही, असे तुम्ही लिहिले आहे. वैवाहिक संबंध नाकारणे हा छळ होऊ शकतो, अशा अर्थाच्या काही न्यायादेशांचा आधार तुम्हाला घेता येईल. याशिवाय वैवाहिक संबंधांस नकार देऊन तुमच्या पतीने एका अर्थाने तुमचा त्याग केला आहे, असाही युक्तिवाद करता येईल; मात्र तो मान्य होईलच असे नक्की सांगता येणार नाही. यातील काहीही न करता, आहे तसेच चालू ठेवण्याचा पर्यायही तुम्हाला खुला आहेच.

No comments:

Post a Comment

Post Bottom Ad

LightBlog